اسكربت جديد بقلم سلمى بسيوني

ناحية أوضة عمر بس قبل ما أخبط سمعت زعيقه
أنت مفهمة بنتي أي!!! قولتيلها أني خۏنتك !!
أنا خنتك يا داليا !!
سمعت صوتها بټعيط وهي بترد
لا
صړخ فيها بصوته كله
طب ليه !!! بتخوفيها مني ليه !
زعقت فيه
لو مخوفتهاش كانت هتسيبني وتجيلك أنت!! 
كانت هتحبك وهتسيبني لوحدي!! كانت لازم تخاف منك عشان متسبنيش !!
تقومي تحرميها مني !!! وترحميني منها!!
كنتي خاېفة تعيشي لوحدك فعيشتيني عمر لوحدي! أنت مريضة !!
أنت عارفة أنا عشت إزاي !!!
أنا عشت نص عمر بنتي في مصحة نفسية عشان بقى عندي هاجس أني مستحقش ولا حاجة حلوة ولا أستحق بنتي !!
حاولت تقاطعه وتبرر فرد عليها
أخرسي !! كنت خاېفة تعيشي لوحدك فوهمتيها وحرمتينا من بعض سنين !! خۏفتي بنتي مني لدرجة إختارتك أنت في المحكمة قدام الناس! وحالا أتجوزتي ومعدتيش محتاجها في حاجة!! عارفة دا اسمه أي أنانية ونقص.
هدي لحظة 
شفتي أي مني وحش يا داليا عشان تعملي كدا فيا ! أنا أذيتك في أي يا داليا !!
سمعت عياطها وهو بيكمل پقهر
دا أنا قعدت عمر كامل بحلم أخدها في حضڼي يا داليا فضلت سنين أتخيل أني بمسك إيديها وماشيين سوا ولا رايح معاها أول يوم مدرسة أتمنيت سنين بنتي تجيلي وتندهلي يا بابا وأشوف في عنيها حب ليا مش خوف.
عيطت وأنا بسمعه بيتمنى حاجات أنا كمان أتمنيتها سنين وعمري ما طلتها.
سمعته بيكمل وصوته كله بكى
أنا فضلت سنين أبعتلها رسايل على أمل ترد عليا في مرة وأما فقدت الأمل بقيت أكتبها ومبعتهاش عشان قلبي ميوجعنيش وأنا بستنى رد منها كل مرة بقيت بكتب رسايل متأكد مليون في المية أنها مش هتتقرئ وأما تصعب عليا نفسي كنت بقطعها وأرميها.
سمعت صوته ضعف أكتر
دا أنا نفسي أسرحلها شعرها ومكسوف أقولها يا داليا !!
فحاولت بصعوبة أمنع صوت شهقاتي وقلبي إلي أنكسر.
وسمعته مرة تانية بصوت ثابت أكتر 
قمت على رجلي بمعجزة اتعالجت وأصريت أكون ناجح عشان لو قابلت بنتي في يوم تبقى فخورة بأبوها وماتشوفنيش مهزوم استكترتي عليا دا كله ليه!!
مردتش عليه فاتعصب وصوته علي
عشان إنسانة أنانية ومريضة !!!
حتى الراجل إلي أتجوزتيه دا مش هيستحملك !
فتحت الباب فالأتنين اتفاجأوا ومسحوا دموعهم قربت عليهم وأنا مڼهارة ووقفت قدام أمي
أنا هسألك سؤال واحد بس هو أنا هنت عليك
إزاي تشوفيني برجع من المدرسة كل يومين أعيط عشان نفسي يبقى عندي بابا يوصلني
قامت من مكانها وحاولت تضمني فبعدت عنها وكأن الكهرباء لمستني
إوعي تقربي.
رجعت لورا فخبط فيه لفيت وقلتله بإرهاق
هو إحنا ممكن نرجع القاهرة حالا 
حاول يبتسم
ممكن جهزي نفسك وربع ساعة ونتحرك.
رجعت أوضتي وجهزت كل حاجة ورجعت الهدوم إلي طلعتها وطلعت الشنط برا هو كان بينزل الشنط مع الشيال وهي واقفة في جنب بټعيط نزلت على تحت معاه وقبل ما نركب العربية شدتني من إيدي وهو بتقول بإصرار
لا أنت هترجعي معايا الكويت.
شديت إيدي منها پغضب
كفاية عليك السنين إلي قعدتها معاك حتى دي كتير عليك.
ركبت العربية وكل واحد فينا ساكت طول الطريق لحد ما وصلنا القاهرة.
طلعنا الشنط وبدأت أرتب الهدوم مكانها وكأنني بهرب من أي كلام وكأن في كلام ممكن يتقال في وضع زي دا.
دخلتله أوضته لقيته هيبدأ يرتب هدومه قربت وأخدتها من إيده بهدوء
هرتبها أنا أرتاح أنت سايق طول الطريق.
قعد على سريره عينه بتتحرك معايا بحزن عايز يتكلم بس مش عارف يقول ايه زيي بالظبط.
ساعات الحزن بيوصل بينا لمرحلة بنعجز فيها عن التعبير أو أي كلام حتى النفس بيقى تقيل ومؤلم والحاجة الوحيدة وقتها إلي بتوصل إحساسنا عيوننا

دي الحاجة الوحيدة إلي كبتك ميقدرش يسيطر عليها بتفضح البني آدم مننا في ثانية وبتداوي قلوب في لحظة وتوجع قلوب من نظرة أكتر حاجة شفافة في البني آدم ومهما قدرت همومه عليه عمرها ما تقدر على عيونه
خلصت الهدوم وطلعت برا الأوضة بصمت ورجعت تاني بعدها بلحظة وفي إيدي فرشة شعري قربت منه واحدة واحدة وأنا مش عارفة أسيطر على عيوني.
مديت إيدي ليه وأنا بقول بصوت مهزوز وابتسامه هادية وعيوني على خلاف تماما
ممكن ....ممكن تسرحلي شعري
دموعة خانته فمسحها بسرعة وهو بيبتسم
أكيد...قربي.
كان بيسرحه بالراحة وإيده بتترعش دموعي نزلت أكتر وأنا مش قادرة أسيطر عليها خلص وحط الفرشة جنبه فلفيت ليه وأترميت في حضنه وأنا ببكي پقهر كان بيواسيني وهو بيبكي بيطبطب عليا ومحتاج حد يطبطب عليه.
فضلنا كتير كدا لحد ما بعدت عن حضنه وبصيت في عيونه
هنعوض إلي فات كله صح
ابتسم وضمني وطمني
هنعوضه.
سمية عمر عبد المجيد المصري.
اسمي أتنده في المايك فطلعت على المسرح أستلم شهادتي إلي تعبت فيها وقلبي طاير من الفرحة!!!
سامعة في وداني صوتين بيهيصولي ويدنهوا عليا أستلمت شهادتي وودعت دكاترتي ونزلت من المسرح لقيتهم واقفين جنب بعض كل واحد فيهم شايل بوكية ورد مختلف عيونة بتلمع بشكل مختلف ابتسامته من الودن للودن.
جريت عليه هو أول واحد أخدني في حضنه وشالني وهو طاير من الفرحة نزلني بعدها وأنا بضحك كأنني عليه صغيرة.
قرب وباسني على راسي وأداني الورد 
الف مبروك يا روح قلب أبوك وأحلى مهندسة في الدنيا كلها...
حضنته مرة تانية وأنا بقوله بكل الحب إلي في قلبي
بحبك يا بابا.
وأنا بحبك يا قلب أبوك.
ما خلاص يا أخونا دوري هيجي أمتى بقى!!
قالها يوسف برخامة فرد عليه بابا
اتلم يا لمض.
يوسف قرب وشدني من قدامه وهو بيغيظه
الله!! مراتي!!
دا كتب كتاب بس يا أخويا.
إتلامض عليه تاني
ولو ... بردو مراتي.
ضحكنا إحنا التلاته ويوسف قرب وأخدني في حضنه
مبروك لأغلى حاجة في حياتي.
بعدت باسني في راسي وإداني البوكيه
عقبال فرحنا بقى دا أنا طلعت روحي معاك.
قلت بشقاوة
أنا دا أنا غلبانة.
والله دا أنا إلي غلبان معاك.
صوت بابا طلع وقتها وهو
بيمد التليفون ليوسف
طب خد يا غلبان صورني مع بنتي.
حاضر يا سيدي.
بعد ووقف يصورنا وبابا بيهمسلي في ودني
متصدقيش الواد دا دا بكاش.
ضحكت وقتها وأنا لبابا وأتلقطت أجمل صورة في حياتي.
كانت الليالي بدونك علقم ولما وجدتك شعرت بأن قلبي يشع نورا
سلمى بسيوني